Behingoagatik, eta aurreko sarrera batean aurreratu nuen bezala, bazetorren Binke eta… iritsi da! Urtarrilaren 20an aurkezpen ofiziala egin eta hurrengo bi egunetan banatu genuen, auzoz auzo, etxez etxe, saltokiz saltoki eta ikastetxez ikastetxe Galdakao eta Usansoloren historian izan den euskara hutsezko lehenengo hilabetekaria!
Proiektuaren berri hainbat komunikabidek eman dute (Binkeren Facebook-eko orrialdean bistan dagoen legez) baina denen artean Berria egunkariaren Bizkaiko Hitzak, taldeko denen ordezkari, egin zidan elkarrizketa hau azpimarratuko nuke: «Euskara ikusezin dutenen etxeetara ere iritsi gura dugu». Urte askotarako, Binke!
