Urte berria lanean hasi dugu aurten ere, batetik urtarrilaren 3an Morgako gazteekin antolatu nuen Sare Sozialen inguruko mahai-inguruan aritzeko, non esker bereziak eman behar dizkiodan Mari Tere Artetxe alkate andreari bertan egoteagatik, eta bestetik Bizkaia Irratian urtarrilaren 5ean Oxabi erromeria taldearen inguruan eskaini nuen elkarrizketa eskaintzeko.
Barikuro «aurpegi ezagun» bati elkarrizketa egiten diote Bizkaia Irratian, eta euren esanetan ni izan behar nintzen urte berriko lehena. Tira ba, aurpegi ezagun ez dakit, baina berbaz gustura aritzen dena banaizenez, baietz esan eta bertan izan nintzen gure taldearen inguruko nondik norakoak azaltzen: zelan antolatzen garen gure artean, non egiten ditugun entseguak, zelan hasi ginen, zergatik, nola aldatu diren denborak Oxabi taldea 2006an sortu genuenetik… eta beste hamaika kontutxo kontatu nituen bertan.
Elkarrizketa osorik entzuteko, egin klik hemen. Eskerrik asko Bizkaia Irratiko kide guztiei bertara gonbidatzeagatik!
