Beste asteburu bat hurreratzen ari da eta, ohikoa den legez, planez gainezka datorkigu oraingoa ere!
Euskal Herriko folk talde onenetarikoa den Kherau-k 5 urte bete ditu aurten. Horretarako, bide honetan bidelagun izan dituzten talde, musikari eta abeslariak batuta urteurren-kontzertu berezia antolatu dute abenduaren 11n, Bilborock aretoan, 21:00etan. Ukaezina da oxabitarrok harreman handia dugula kherautarrekin eta geure taldearen ordezkari igoko gara taulagainera Jon Eguskiza (taldeko trikitilaria) eta biok. Oxabik ere gonbidatu zuen Kherau, beste hamaika artista lagun eta ezagunekin batera, Gure Esku Dagoren aldeko kontzertu berezia egin genuenean Bilboko Areatzan. Zorionak eta urte askotarako, Kherau!
Ostirala pasata, hurrengo egunean ere badugu zeregina. Larunbat goizean, EITB Maratoiaren aldeko jai solidarioa aurkezteko ohorea izango dut Gasteizko Arka Plazan. Graffitiak, kontzertuak eta pintxoen banaketa izango dugu Ikara dezagun beldurra lemapean. Bertan batutako diru guztia, gaixotasun arraroen ikerkuntzara bideratuko da bete-betean.
Arratsaldean berriz, Oxabiren txanda dugu berriro. Hurrengo denboraldia prestatzeko kontzertu bako atsedenaldian bagaude ere, tartetxo honetan salbuespena egingo dugu hurrengo abenduaren 12an Tuteraren historiaren lehenengo Euskararen Egunean parte hartzeko!!! Tuterako euskalgintzako hainbat talde eta elkarte ari dira jai berezi honetan lanean, eta oxabitarrok hortxe egoteko aukera ez dugu galdu nahi izan! Gora Erribera euskalduna!
Asteburua igandean bukatu ohi da, eta musikaz beteriko asteburua musikan amaituko dugu asteon ere. Horrela, Galdakaoko Ganguren Mendi Taldeak urtero Gabonen bueltan antolatzen duen Turroi Egunean jotzen arituko gara Andra Mari Dantza Taldeko musikariak. Herriko elkarteen arteko lankidetzaren beste adibide bat baino ez da izango abenduaren 13koa!
